08/09/2006

حوار ليبي جدا

ليبي: اوووه مراجع كيف حالك وكيف حال هلك ..ايش تدير هنا
 

ليبي اخر: مرحبتبن ياعاشور .. كيف حالك انت وكيف حال شيابك
 

مراجع: والله الحمد لله الشايب مع خوي الكبير في تونس يعالج ...من يومن بلغونا علي حياة سعيد وهي صحته لاورة
 

عاشور: الله الله يا سعيد ... الله غالب ... بالله ايش داير ... شاب كويس وصلاي ... يحبسوه عشرة سنوات بلا زيارة وبعدين يقولك توفي ... ياراجل ... ااااه ... يستر الله
 

مراجع: الله غالب ... حكومة حبالها طوال ....وانت ايش اخبار هلك انا شفت خوك( علي) امس في امانة الصحة فيده ملف
 

اشور: اهو ... ماهو يجري علي موضوع وليده الصغير ... هو من عويلة الايدز ما راك الا عارف
 

مراجع: ااااااه عليك حالة ... عويلة صغار ايش ذنبهم ... الله غالب ... كيف الناس لاباس... ومفتاح ايش اخباره توا انشاالله صحته كويسة بعد الحادث
 

عاشور: اهو تو خير من قبل ... طريق ضيقة والحفرة هذك صارن عليها حوادث واجدة ... والسيارة مانك غابي علي قد الحال ... الله غالب ... طريق مش قادرين يصلحوها من عشرين سنة والناس تشكي ... الله غالب .. يفرج الله
 

خطرها عالمشاكاه ... مافيش اخبار عالمرتبات تو هضا نص الشهر هلب ونحنا نرجوا
 

مراجع: ياراجل اللي يرجى خير من اللي يتمنى ....هو مرتب شوي من غادي وما ينزلوه لين يدرهو كبودنا
 

عاشور: ياراجل واطي حسك ... راك تريح في ستين داهية ... حط راسك بين الروس وقول يا قطاع الروس ... يعني شن ينفع الكلام ... ليد ما نعاند المنجل
 

مراجع: والله ملينا يا راجل ... البلاد حالتها زي الزفت ... وفلوسنا طراطيش في .. كل تركينة ... حرام فينا نعيشوا زي الناس....يا راجل بلاد لا مستشفيات لا مدارس لا طرق ..علي الحلال حالة تقهر
 

عاشور: اسمع فك روحك من الكلام اللي لا يودي لا يجيب ... راك تلحق خيك حتى انت .. المهم... الجماعة ملتمين الليلة في مربوعة سليمان علي موضوع التصعيد راهو العرب يحشدوا ونحنا راقدين علي وذانا ...لازم تجي ... هالمرة هذه لازم ناخذوا امانة المؤتمر ...ولوكان متنا دونها
 

مراجع : ولا يهمك الليلة تلقاني اول واحد غادي وحياتك واتيلهم وكبدي عليهم دم عيت فلان ..هالمرة ماهم واخذينها لوكان نموتوا دونها
...........
...........
...........
وتستمر الاوضاع على ماهي عليه الى حين اشعار اخر
 

طارق العقيلي