10/08/2007

كل الرسائل تنشر كما هى وبدون تصحيح للأخطاء الإملائية أوالنحوية

الخلافه الفاطمية والصدر والمهدي الـ منتظر

وانا صغير قريت كلام باهي لموشى دايان قال فيه العرب ما يقروش وحتى لما يقرو ما يفهموش, نا بيدي سعتها إعويل بس إلكلام هظه خش لمخي و حلفت إني لازم إنتنور بالقرايه, ومش هظه أو بس نا بيدي لازم نفهم إلخبر و ندقق فيه بالحيل قبل ما إندير أي حاجه.

مازلت جايكم بالخبر, كيف ما سمعتو في ليام إلي فاتن كثر إلكلام وبلا مجاحده علي الخلافه الفاطمية, وقلت إل روحي شنو هالتخريف والاهي شكله صاحبنا سلم الطارقات ومخه طقطق بكل, سعتها خطر عليا وليد عمنا موشى دايان ولي قاله ومنها وانا راني إندقق ونبي نفهم. مازلت جايكم بالخبر, قعدت إنربط في هالخيوط ونربط, في نهايتوه وصلت للزبيده متاع الميضوع وبيش إنقولها لكم لازم إنوريكم كيف جت بالك تبدو تقرو وتفهمو من توا.

يا سيدي وما سيدكم إلا ربي صويحبنا راجل إيتكم ويخطط على روق من زمان هلبه كيف ما يقولو خوتنا إلغرابه, إلناس كلها عارفه إلقصه إمتاع موسى الصدر وكيف من سعت جيته لنا معش روه, تو نقولكم ليش معش بان لاكن مش توه, سع تجيكم بعدين, إصبرو علي شوي راني شويب كبير وكل حاجه إندير فبها إوحيده إوحيده.

وجيتكم في الكلام كلنا نعرف إن صويحبنا حاسب روحه حاجه كبيره مش من دون ومش هكي أو بس راهو حاسب روحه أنزك واحد فينا بعد الرسول بعدين نقوللكم شن نقصد بلكلام هظه.

نبي توا إنفيدكم بحاجه من تاريخكم وتقول إن أفريقيا كان سعتها إسمها ليبيا تي حتى بوعويشه قالها ورطل بيها نين إمسيكين دهش, مازلت جايكم فيلكلام بس نبيكم تحللولي روسكم شوي عشان رانا خشينا فيلقوي.

لما دز صاحبنا للشيعه متاع العراق وتكفل إن ليبيا إتكفل وترمم مرقد إمامهم العسكري إلي رزاهم فيه الغزال بن لادن قعدت إنفكر و نفكر وندور وندور ولقيت معلومه مقيوله من قبل تقول إن صاحبنا قال في مره من المرات إن خوتنا القذاذفه من أولاد موسى يعني بالعربي من سلالة موسى الكاظم, قلت زين كلام ما هوش غريب لأن الحكام العرب كلهم إنسبو أرواحهم للنبي.

ومره من المرات صاحبنا تكلم عن كتاب كاتبته إبنيه كنديه باهيا بالحيل إسماها جريس هالسل وإسم لكتاب النبؤة والسياسة, أكيده تقولو شكله عمنا الحويج خرف ودوخلكم روسكم بهال لقطاف, إصبرو, الصبر كويس, يا سيدي الكتاب يقول إن إسرائيل بعد ما تتكون سع تعرض لهجوم واعر بلكل من ناس وأمم يسكونو في ليبيا ,إلي في هظك الوقت كان إسمها ليبيا بس توا شنو إسمها.... أفريقيا, برافو بدينا نفهم هه. بس شنو دخل موسى والفاطميين والشيعة, جايكم فيلكلام إوحيده إوحيده, كتابات إمتاع الشيعة تقول المهدي المنتظر إلي هو كيف ما يقولو من سلالة النبي وهو إلي ينهي إسرائيل ويشرد ويقتل تسع أعشار العرب.

توا نبدو نربط في هالخيوط, يا أسيادي وما عليكم إمجاحده صاحبنا يحساب روحه المهدي المنتظر بس ما يبيش إيقولها بروحه, يبي الهبل جماعة اللجان وغيرهم ينادو بيه المهدي المنتظرعشان ما حد إيقول إنجن الراجل, بس البهايم إلي عابي عليهم حتى همه يقرو وما يفهموش وما فهموهاش عالطاير.

باهي شنو قصة الفاطميين, توا نقولها عشان خاطر همه نسبو أرواحهم للرسول يعني صويحبنا هو إلي يكون المهدي المنتظر القذافي إلي هو كابو الدوله الفاطميه إلي حتخرب إسرائيل ويشرد ويقتل تسع أعشار العرب, إنشالله فهمتو.

باهي شنو قصة الصدر, وليد إختي, تي حتى انا عندي ولد إخت مش بس خويا الحاج الطرابلسي, قالي ، إن القذافي عرض علي الصدر الكلام هظه وطلب منه إيتكمله خطه و ينادي بيه المهدي المنتظر لاكن موسى كان راسه يابس وعنزله, مشى القذافي دزه إلخالقه. إنشالله فهمتو.

أوبيش توا ندقق في إلي فات, الشيعة تقول إن المهدى قائد عسكري و يقود الامم في حربها, عرفتو ليش سمى روحه القائد الأممي وعرفتو ليش يبي جيش أفريقي موحد. وعرفنا ليش تسمية الملهم وفهمنا ليش هو يقول لكتاب إلخضر هوإنعتاق الشعوب وهو الطروح النهائيه , هو من ناحية طروح فنلقانا طروح بلكل.

لحويج البرقاوي