23/08/2007

كل الرسائل تنشر كما هى وبدون تصحيح للأخطاء الإملائية أوالنحوية

الفاملي اللي تحكم بطرابلس

(من حكايات البسباسي بالطرابلسي... يا 17)

السلام عليكم

مزال يا ما تشوفو يا ليبيين... كان ربي أعطاكم عمر يا ما حا أتشوفو من عجايب .. الفاملي إللّي تحكم في ليبيا فاملي مستواها أقعد من طبقة النبلاء ومن طبقة الأسر الانجليزية ... وبعدين أهو النجل الاكبر قالها .. (بويا كيفه كيف ملكة أبريطانيا) يازينك بو .. والله ..

الفاملي قعدت غنية ومقامها طبقة النبلاء .. وبعد أشوي أيقولوا أحرام نحنا حرام فيكم يا ليبيين ..
الكونداليزا العبيدة أهي جت للخيمة يا فرحتكم يا نبلاء ليبيا .. ودونك يا شلقم أستقبلها .. ويا فرحتك با فريحة .. أهماه الأمبرياليين قعدولك أصحاب .. أهماه رعاة البقر دارولك زيارة ..

(ريغن يا راعي البقر) .. قعد راعي الكحيلة يا ليبيين, ياللي تاكلوا في البازين .. أهماه جو اللي يبوا ايوكلوا الفاملي الكونتاكي والكيك الأمريكي وصلوا .. والزميته والبسيسة مش من مستواهم.

وانتم يا ليبيين حتى البازين أحرام فيكم .. كولوا الشعير والميي .. ليش لأنكم مش من سلالة الفاملي .. سلالة عظيمة الفاملي والحظ الشين هو اللي جابهم عندنا .. الفاملي أمتاع الشيخ الزبير الأنجليزي أطلع ولد عم الأب الأكبر أمتاع الخطوط الحمرا.

أهي الفاملي ولدها قاللكم نبوا أخطوط حمر, دير أخطوط كيف ما تبي واللي تبيه ديرا يا نبيل ليبيا الجديد, لكن حياة الليبيين مش خط أحمر يا مقتدى ليبيا الجديد, يا زعيم الأنترنت والكومبيوتر الجديد يا مستر سيف ... WELinfoE MR ZIEF ... ويل كوم ..

غيروا اللغة أمتاعكم خيرلكم يا فاملي خلوها .. انجليزي .. بيش تمشي مع مستواكم الجديد .. الكورة أمتاعكم بدعة .. تي حتى الطليان دوختوهم أمعا المستر (سادي) .. مستر سادي حتى هوا بدعة ما بعدها بدعة .. بس غير وين الإبن الأكبر للفاملي ... أمسيكين شكله سلالة برانية ومش بدعة .. وشكلها المرا (الملكة الجديدة) أمسيطرة على الوضع العائلي بوكل لعند قاطعة النفس على مستر (محمد الكبير) .. دار أشوية جو وبعدين أمشا لبعيد.

يا ما حا أتشوفوا يا ليبيين .. يا ما ما .. وخليكم ساكتين لعند أتشوفوا اللي ما شفتوه .. بالله اللي عنده دم ليبي صح يمشي أديرلها عيطه أكبيره قدام السرايا .. أوكان مسكوه الجماعة - ذيول الفاملي - أيقوللهم (سني توجع فيا ) .. قولنا السريا مش (الساحة الخضرا) لأن السريا ملكنا نحنا الطرابلسيين مش ملك لعظماء الفاملي .. وبعدين لبحر توا نقسموه يا فاملي .. يا شينك أوجوه والله .. أوجوه أتذكرك بحليب النياق وأتذكرك بالسكته القلبية.

زعمك يقعد اللي أنشوفوا فيه من ضحك أعلينا كاميرا خفية يا ناس .. تي بلكي كاميرا خفيه يا هووه .. أنتم يا جماعة المعارضة تي بلكي حتى أنتم دايرين فينا جو مش أمليح ومشتركين حتى أنتم بالكاميرا الخفية ... زعمك اللي أنشوفوا فيه كاميرا يا اولاد .. تي أصلا والله اللي صاير فينا ما إيصير الا بالكاميرا الخفيه تي باهي.

أمال منير  - طرابلس
حركة العصيان المدني بليبيا

amalmnr@yahoo.com