من
مذكرات شاب بالمعتقل: حوار أم شجار مع (لجني ثوري) ؟ .. للتحقيق(2)
تحية طيبة
الليل بمدينتي
مقام لم يعد يسكنه السكون فمن يكون صاحياً به فله همه , ومن كان نائماً ايضاً
له همه .. فكل شيئ قد تلمسه بمدينتي سيصرخ لك بالهم والحزن ... فحتى طفلنا
يعاني من الهم وينتظر بأن يلون غده بيوم آخر مختلف ولكن يومه المنشود لم
يتغير أو يتلون بلون الحياة ..فقد اعتاد صباح بلادي ان يكون مثيلاً للأمس ..
فأمسنا مهموم كما يومنا هذا حزين ... ولكن الأستاذه (هند البركي) تقول حكاية
بفلنده ذكرتني كثيراً بالفارق بين الإنسان الذي كرمه الله هناك, والإنسان
الآخر الذي كرمه الله هنا, ولكن يد العبث الشيطاني الجاهل جعلته بأرضه وسكناه
دون مستوى ذاك الإنسان, وليكون ويصبح ويمسي بالليل اللاإنسان....
(نهاية ما ورد
بالجزء /1.. الحكاية باللهجة البنغازية مع الاعتذار وكما ورد )
- ما شاء الله ..
ما شاء الله عليك فحل ما أبعده فحل .. حتى خوك اتشيله وبوك اتودره في ستين
داهية .. ما شاء الله .. ما شاء الله .. وعليش هال البطولة كلها .. انت شايف
يا (لجني يا ثوري) كيف أوجوهكم امقلبــــات .. والتقليبة اقعدت أتزيد يوم بعد
يوم .. نين قعـــد منظركم أطروح .. واحتمال عميلكم وأفعالكم السودة هذي اتخلي
وجهكم كيف وجـه (دانمبي)
* امفلبات ..
امقلبات .. امفلبات ..دانمبي .. حيه عليك وحيه .. نهارك اسود نهارك أسود ..
وأكحل .. وأزرق .. توا أنوريك .. توا أنوريك
- أتوري .. تي
امشي روح واعلا ما في خيلك اركبه .. يا بصاص .
* بصاص ..بصاص ..
حيه على امــ .. حيه حيه على امــ .. حيه الو ...الو .. الو .. ميلود ميلود..
ميلوووووود
ايوه يا لجني
امعاك ميلود .. ميلود ميلود جيب الجماعة كلهم وتعال أبسرعة .. أبسرعة قلتلكم
.. (قفل الهاتف)
توا أنوريك ..
الخيل والحمير وكل حيوانات من اجل البقاء اللي شفتهم في عمرك.
ولكن الليل جا يا
فالح وزعمك (لجني ثوري) اديرها ... لا ..لا .. (لجني ثوري) جارنا وعشرة عمر
.. وبعدين انا شنو قلت ؟ .. انا قلت ان بلادنا الحياة فيها تبيلها إعادة نظر
.. تبيلها بناء كبير بيش إيعيشوا فيها ناسها كيف الناس ... وهضا كلام شنو فيه
..شنو فيه؟... شنو فيه؟... حية عليك وحية .. وأنسيت يا فالح الفالحين .. الـ..
وجوه.. المقلبات .. ووجه دانمبي .. دانمبي .. دانمبي .. بلا نهاري اسود .. لا
لا..لا .. لجني ولد شارعنا وعيب اديرها .. وبعدين دانمي امتاع الرسوم
المتحركة شنو فيها لا لا لجني غير إيبصر عليا .. هوا ديما أبصايري .. معنا
لجني شرتوله من يوم يومه وهو ذايح في الشوارع ولا علم لا خبر لا كرنكاطي ..وما
صدق.. لقا .. لقاقـــة كيفه اديروله سيارة ومسدس بيش يكمل لجني ويكتمل ..
ازعمك اديرها لجني ؟ ازعمك ايبص الـ .. س ؟ ابعدك الجماعة زياراتهم في الليل
يا بوها .. ويليل عليك الليل .. الزيارة في الليل بس وفقط يا خالي .. امالا
شنو تبيهم ايدورلك زيارة في النهار واستدعاء مكتوب فيه ايها المحترم .. أو
ايها المواطن السيد ؟ أو أيها المواطن النزيك ؟ أو حتى أيها البني ادم .. أو
ايها البشري لأقل تقدير بيش يشعروا الليبيين بالإحترام .. اه اه اه احترام ..
بعد دانمبي؟ .. لا أعتقد يا بوها ؟ لا اعتقد ؟ّّّ!! .
* افتح الباب ...افتح
يا خرا ......افتح الباب قتلك .
- من .. من ..؟؟؟
من اللي دق .. من انت ؟؟؟؟ .. من اللي دق عال الباب ؟ احم .. احم .. من اللي
دق عال الباب ؟
* قتلك افتح يا
بهيم .. افتح يا يا وجه الـ .. افتح يا رميمة ..
- لا حول ولا قوة
إلا بال له.. لا حول ولا قوة إلا بالله .. عقاب عمري عقدت رميمة .. تفضلوا
انشالله خير .. من انتم بالله ..
* وينه .. وينه...؟؟
.. اولدك وينه .. طلعه ولا انخشوله نحنا .. يا حثالات .. يا جراثيم .. يا
...!! يا ... !! توا انروكم كيف اتربوا اعيالكم يا كمشة اتيــ .. !!! افتح
قتلك افتح الهـــ !!!
- باهي باهي توا
نفتح .. غير صبر بالك اشوية .. اولدي كنه .. كنه .. كنه .. كنه شنو داير يا
افندي .. كنه .. كنه
* لا اتزيد لا
أتنقص جيبه خيرلك حتى أنت .. توا تعرف بعدين .. أهواه .. أهواه .. أهواه الـ
الكلب .. تعال تعال يا حمار ويا وسخ يا حقير .. اطلع وآنت لا بد كيف البنت!!!
..اطلع اطلع .. يا ولد الـ .. !!!اطلع يا تيـ .. اطلع يا جرثومة .. اطلع يا
فاســ ..!!! اطلع .. جيبوه .. جيبوه .. جيبوه .. جيبوه
- تغير شنو فيه يا
هووه .. بلكي غالطين في الحوش ؟؟؟ بلكي مش انا ؟؟ راني مسلم كيفكم يا
هووووووه ...صلوا على رسول الله يا جماعة .. راهو الدوه بالعقل يا عرب .. غير
بشويه يا راجل الله يهديك.. الله يهديك.
* مسلم .. مسلم ..
رسول الله !! توا أنورك الإسلام من جديد يا فاســـ.....!!!
- عيب هال الكلام
هضا .. يا .. يا .. يا جماعة الخير !!!! هلي وامي وخواتي يسمــعوا فينا ..
كلام هضا راهووو عندنا عيب .. وبعدييييين انتم ككنكم ؟؟
* جيبوه طلعوه
الفاسـ .. طلعوه .. وفي الكوفنو .. حطوه .. وجه البنت ..
- غير أرجى يا
راجل خلينا انتفاهموا .. انتفـ .. هموا.. والله خيرلكم .. تغير صلوا على
النبي يا جماعة .. والله ما درت فيها حاجة ..غير اسمعوا بس ..
(والجميع بالشارع
يستمع بخلف الأبواب ....وخرج احد شيوخ الشارع ليقول):
- السلام عليكم ..
امسا الخير.. (مع ابتسامه مخلوطة بالخوف ومد يده ليسلم على أحد ا لجماعة # بو
الشــدوق # ).
* تراه روح ارقد
يا حاج والموضوع مش شورك وخلينا نشتغـــلوا على حالنا تره .. درق وجهك وروح
ارقد يا أ نعن ..!!!!
- لا حول ولا قوة
إلا بالله علي العظيم .. استغفر الله العظيم .. استغفر الله العظيم, اللهم لا
تواخذنا عن ما فعل الـــ ... !!!!
* حطه في الشنطة
أمتاع (الداوو) .. يا ميلود .. ميلود دك التــــ ..!!!. في الكوفونو .. مسعود
.. مسعود .. ولع السيارة
- الكوفونو ..
الكوفونو .. الكوفونو .. بلا بلا عليك استكراد .. حقوق إنسان اه .. وينك يا
الكوفي العنان وينك؟ .. كوفي عنان من ؟ تي حولوه !!! شالوه .. بلاش تي وينك
يا محمود شمام ؟ محمود شمام ؟!!.... نهارك بنفسجي ؟؟ أسسسس أسسسس لوكان
يسمعوا أحريف من اسمه ايفتلكوني بوكل ...بلاش الجماعة وينكم ؟.. اللي جابوهم
في المستقلة .. أسسسس أسسسس.. أسسسس أسسسس ... أسسسس أسسسس .. تي اسكت مستقلة
من ؟ مستقلة من ؟ قالك جماعة المستقلة .. مرحب مرحب .. اديروك اشوايه وبعدها
قلاية وبعدين باحــــاية .. باحاية شنو يا سي الهـــ ..!!! تي توا وقت دوا
بعد هال الشرمولة ,, تي اسكت اسكت .. أنطمر .. أنطمر
لكن ذيل (الداوو)
كنا واسع .. يا سلام ومشرح .. وتلعب فيه كارطة سته ,, سته ,,, كارطة .. حاله
.. أهوو الكلام اللي امودرك في ستين داهيه .. ستين داهيه من ؟.. لا هذي
تقريباً سبعين ولا مية داهيه .. أسسس أسسس .. جراي السواق شكله .. وبعدين هضا
شنو الي تحتي ؟؟ بلا الكريك .. خزيه على الكريكات كلهن .. تي حتى اكريكاتهم
كيفهم .. حقوده .. بلا .. بلا اتبز من جميع التراكين .. لا لا مشكلة .. طالما
الكريكات في خدمة المواطن .. لا ضير, ولا عتب طالما هؤلاء أبناء ابلادي,
ووطني, مش مشكلة, ولا مشاكل .. وبعدين كنها طولت الطريق وسي السواق لاهوو
امعقب لا بيسته لا حيطه ايخش فيها ,, وبعدين كنه فرحان هكي ؟.. جراي يا سواق
.. جراي .. وسواق بدعة شوره .. مش مشكلة سواق أبلادي .. غير نطلع توا أنوريه
السواقه والجري على أصله ..غير نطلع بس ,, غير نطلع .. نطلع من ؟
* نزلوه .. نزلوا
الشرتيله .. نزلوه
- يا شينك ليلة
سودة .. لا حول ولا قوة إلا بالله علي العظيم .. لا حول ولا قوة إلا بالله
علي العظيم .. منك لله يا لجني ثوري .. منك لله .. منك لله .. وشكلك شلت
الكلام بارد وساخن ومسقع .. لكن والله غير نطلع من هال الخارقة أنوريك ..
انجيبلك بوراس ,,, واسلومه الضخم ...وأنكسرولك سيارتك وحوشك بالحيط .. وبعدين
اولدك .. الدبة .. توا ايشوف حتى هوا .. بلا .. بلا .. يا شينك مكان تي هضا
شنو؟؟ .. بلا تي .. هضا وين .. يا شينك مكان موحش .. تي حتى الكلاب فرحانات
.. خزيه..اتفــوه .. عال الكلاب كلهن .. قالك أنربي كلب .. خزية .. ريت ما
أيهز في ذيلة؟ .. فرحان الكلب لجرب حتى هوا .. قالك حقوق حيوانات .. غير نطلع
بس .. الكلاب كلهن انشيط فيهن النار .. خزيه يا كلاب توا اتشوفن .. غييير
نطلع .. اه .. اه .. با عليك ليلة سودة .. لا .. لا .. ليلة نوده .. نوده شن
معناها وانت بديت اتخريط .. وبعدين لجني ثوري ولد شارعنا توا ايصبي امعايا
تصبايت رجاله .. مش جاري هوا ؟؟.. ولا كيف؟ تي لجني ثوري ولد شارعنا ومدينتنا
من زمان .. واكيده هذي غير قرصة وذن .. بس .. اقريصة وذن وبعدين أنروح .. لا
أكيده أنروح .. وبكرة اندير حمام سمح ..وأنصليلي ركعتين استغفار لله .. وشكر
.. ونشرب قهوتي فوق السطوح وأسبيسي سمح وناخذ اكتباتي ..وانشوفلي ابنية
الشارع السمحة .. ونعدي نحضرلي كم محاضرة وأنروح بأمان الله .. تغير انا شنو
دخلني بهال البلاد ومشاكلها بس ؟؟ تي ماهو نقعد كيف خلق الله في حالي ..
وانشالله تخرب .. ويعني هي مش خاربة ؟.. تي ماهو خليها اتزيد خراب ..
وانشالله ما اصلحت .. وبعدين يا شينك اقطاف زايد ابلاد خاربة شنو فيها .. ما
فيها شي .. ولا خلاص كان اقعدت خاربة .. وما تقعد خاربة انشالله ما اصلحت ..
توا باهي هال التكركيره السودة .. توا باهيه قدام هلك وأمك ..والشارع كله ..
بلا أبعدك الشمامتية واجدين .. والعرج اكيده فرحان حتى هوا .. واديرلي في
روحه ديما بطل الفيلم, ودايرلي رسائل غرام .. يا عليك القديم, وبعدك جايبها
له على خشمه .. بلا .. بلا .. يا شينك هزيبة .. ودايرلي روحك حتى انت بطل
الفيلم , جامعة واكتابات ومحاضرات .. وعطور .. وكنادر .. ومرات قروايط ...
باهي توا ... ترحيت .. بلا (بو الشدوق) شكله نواي الضرب ؟؟
(وأذن لأذان الفجر
.. من بعيد في سكون الليل وصمته القاهر .. الله اكبر .. الله اكبر .. للننتقل
بالجزء التالي بداخل المعتقل للتحيق.. فما شكل مكان المعتقل ؟ ومن هم زواره ؟
ومن هم سكانه ؟ ومن هم حراسه ؟ زملهو ذاك التحقيق وشكله ؟)
انتهى الجزء 2
والسلام عليكم
بنغازي 17 - ح ع م
راجع الجزء الأول
|
