هــــــــدرزه قبل آذان المغـــــرب

 

إللي يحلم بتغيير سياسة القذافي كيف إللي يحلم بتحويل ألمانيا لأفريقيا ولا الصومال لأوربا القذافي فات الستين وبينه وبين القبر شبر ولا شبرين وهو ( لول مازال في ضلاله) واللي منكم شاف لقاءه لاخير مع قضاة العادي والحسادي يتأكد بأن القذافي فعلا ( لول مازال في ضلاله) فسخرية من السنة النبويه وعدم إعترافه بها كما كان يهذي طيلة بعد خطاب زوارهفي السبعينات لازال كما هو ما تغير شي.

 

القذافي كل إللي تغير فيه هو أنه أمن فترة حكمه لسنين متعفاقبه وذلك بالأنبطاح لأمريكا التي كان يعتبر أي ليبيا يتعامل معها خاين ورجعي ومن الطابور الخامس – سبحان  مغير لاحوال – والمسرحيه التي يؤديها سيف الإسلام مع أبيه المخرج هي : واحد يشد ولا خر يرخي- فوعود سيف كلها ذر الرماد في العيون وكلام في الهواء شفهي لايوتكل ولا ينشم كيف شجر النــم –  شجر الإيكوليبتس أو الكينا باللاتيني – ويافقر ماغناك قعود. فأهلنا في ليبيا مازالوا يعانون. سواء تأخر المرتبات وجمودها بسبب قانون القذافي15  والتجاره – المغمسه بالزقوم – بسبب تحكم عصابات الأمن في رؤوس الأموال مما يظطر معه المواطن الليبي لدفع الإتوات والرشاوي والعشاوات لأصحاب الكروش الكبيره من عصابات النهب العام بالشعبيا الشعبيه للجماهيريه العشبيه ومتعها يا عشبه.

 

بالله اللي يقولوا أن القذافي أسقم وتما حنون ويبي ويبي ويبي.. ينورونا ويورونا شنوا إللي تغير فيه؟ بالك عيونهم خارق حارق اتشوف العجب اللي عيوناتنا ما قدرتش أتشوفه؟؟!!.

 

عموما سامحونا على الهدرزه قبل آذان المغرب والله يهلك كل ظالم وياخذ الحق منه ومافي شي واعر علي ربي .

 

تبقوا على خير

 

سعيد الجطــــــــــلاوي

سويســــــــــرا

getlawy@hotmail.info