- منو منــــو ....!
- قلنالك اسمه خليفة !!!
- باهي باهي خليفة منو ..
- قال اسمه خليفة الرانجة ..
- شينك اسم يابوصاحب ..
- حتى اني تعرفت عليه ...
- ومنين زعمة سي الرانجة ..
- الباين شكله من البي سي (أبوسليم) ..
- ياراجل وجهه خريطة ...
- والله صح وجهه يخوف ...
- وين تعرفت عليه ...؟
- تلاقينا مرة فى الطلياني ...
- حتى أني شفته مرة فى الصحابة..
- اماله مايجيش للرشيد ...
- فكنا منه ياراجل أبعد عالشر وغنيله ...
- حرام عليكم ياجماعة ..هذي قرمة وانتو كلكم تصلوا ...
- حرام ولا حلال الرشيد ماو باسم حد...
- ياجماعة ..الراجل يصلي والا مايصليش هو في النهاية ليبي ..
- إيه ...إيه ليبي غصبا عنك وعني ...
- الســـلام عليكم ... غير ردو السلام ياجماعة ..
- ماتعدلش يا بوها .. الجماعة لاهيين ...
- على منو زعمة اليــــوم ...
- لا... لا غير كلام يجيب كلام ...
- غير منو.. منو .. ؟
- قالك خليفة الرانجــة ... ...
- آه ..آه خليفة ؟ الشبوب اللى جاي من تورنتو....
- قالو وجهه خريطة يا شيــخ ..
- والله حرام عليكم ياجماعة... الراجل هذا ولد بيتية ...
- إسمع .. إسمع حل وذانك واسمع .. قالك ولد بيتية !!!
- تعرف الراجل هذا ... اسمه الدكتور خليفة "..." وعرفت بوه منو !!!
- دكتور !!! قلت دكتور .. يا ودي مش باين ...
- إيه إيه دكتورونص وخمسة ونزيد نقلك من أعرق العائلات فى طرابلس
وراهو ولد فلان !!!
- معقولة يا راجل .. سبحان اللــه !!!
- وبعدين الراجل مثقف.. متعلم وزيادة عن هذا متدين وعنده الدكتوراه...فى علم الأديان من جامعة القرويين بفاس !!!
